ဆိုရေးဟိ၍ ဆိုပါသည် (၁)

ရခိုင်သားတိုင်း ရခိုင်ပြည်ကိုချစ်ကတ်တေဆိုစွာ ရခိုင့်အမျိုးသားအားလုံးဧ့ မွီးရာပါ အမွီတစ်ခုဖြစ်တေ ။

ချစ်တေ ။ အချေပိုင်ချစ်တေအချစ်က သည်းခံနိုင်စွမ်းအားနည်းရေအတွက် တုံ့ပြန်မှုယင်စွာနန့် ၊  အကြီးပိုင်ချစ်တေအရာက သည်းခံမြော်မြင်ရေအတွက် တုံ့ပြန်မှုနည်းရေ သဘောသဘာဝတော့ ဟိကတ်တေ။

အမှန်က ချစ်ဖို့အတွက် အချစ်ခံ အရာဝတ္ထုတစ်ခုခုနန့် ချစ်တတ်တေ စိတ်ရင်းတစ်ခုပါမှ ချစ်တေဆိုရေ သဘော သက်ရောက်စီရေ ။ အရာဝတ္ထုဆိုရေအထဲမှာ သက်ဟိဖြစ်ချင်ဖြစ်ဖို့ ၊ သက်မဲ့ဖြစ်ချင်ဖြစ်ဖို့ ။

ယေကေလေ့ ချစ်တတ်တေ နှလုံးသားအပြောင်းအလဲမဟိပါလေ။

ကောင်းဗျာလ်  ၊ ရခိုင်ပြည်ကိုချစ်တေ ၊ ရခိုင်လူမျိုးကိုချစ်တေလို့ ရခိုင်သားတိုင်းပြောကတ်စွာ များရေ ။ တိုင်းပြည်နန့်လူမျိုးကိုချစ်တေဆိုစွာ ချစ်တတ်တေနှလုံးသားတစ်ခုတည်းဟိလို့ ပြည့်ဝရေ အဓိပ္ပါယ်မဟိ  ။ အကျိုးပြုမှု တစ်စုံတရာပါမှရာ ချစ်တေဆိုရေသဘောက တန်ဖိုးထွက်ဖို့ဖြစ်တေ။ ယေန … ငါရို့ အဖရခိုင်ပြည်နန့် ကိုယ့်ရခိုင်လူမျိုးအတွက် အကျိုးပြုမှု တစုံတရာကိုဖော်ဆောင်ဖို့ အရေးကြီးလာတ်တေ။

ငါရို့ ဇာလုပ်ကတ်ဖို့လဲ ။ ဆရာစံကျော်ထွန်း ရက်ပြတ်မိန်းခရေ မိန်းခွန်းတစ်ခု …. ငါရို့ ဇာလုပ်ကတ်ဖို့လဲ ။

ရခိုင်မှန်ကေ ရခိုင့်အကျိုးပြုမှုနယ်ပယ်တခုခုထဲမှာ ပါဝင်သင့်ရေ ။

ရာစုနှစ်ချီလို့ ကျွန်ဖြစ်လာတ်တေ လူမျိုးတမျိုးစွာ နှစ်တိအကြာကြီးဖြတ်သန်းပြီးရေနောက်ပိုင်းမှာ ဆင်းရဲစွာနန့် ကြောက်စွာကလွဲလို့ ဇာတခုလေ့ မကျန်လို့ ဆရာကြီး ဦးသာထွန်းက သတိပီးဖူးစွာကို မှတ်သားမိရေ ။ အယင်ကဆိုကေ ဗမာအာဏာပိုင်တိကိုကြောက်ရကေလေ့ ဂုဆိုကေ …ကုလားကတမျိုး ၊ ဗမာကတဖုံ ၊ ပါတီလို့ရာတမှောက် ၊ သဘာဝဖီးဆိုးရာတဖုံ ၊ ယင်းအထဲမှာ အစိချေနန့် အရက်ကရာ နှိပ်စက်နန့် ရခိုင့်မျိုးဆက်နယ်ပယ်တခုစွာ ဇာနောက်ကိုလိုက်လို့ လိုက်ရကောင်းမှန်းမသိယောင်ကို ချာလပတ်လည်လို့ ရခိုင့်ဆင်းရဲသံသရာအမွီဆိုးရာ အဖတ်တင်လာတ်တေ။

ရခိုင်ပြည်စွာ ဓညဝတီလို့နာမတွင်ရေအတွက်န ဆန်စပါးလုပ်ငန်းစွာ ရခိုင့်စီးပွါးရေးဧ့အသက်ဖြစ်တေဆိုစွာကို ဂနိရခိုင်ပြည်သူ ပြည်သားတိ မိ့ပါလာတ်စွာလား ၊ ထွက်ပါလာတ်တေ ရီနံ ၊ သဘာဝဓာတ်ငွေနန့် တခြား သယံဇာတတိကြောင့်ရာ မိ့ကွန်ကွန်ဆောင်လာကတ်တေလား မဆိုနိုင်ဗျာလ် ။

တောင်အာရှဧ့ တချို့နိုင်ငံတိစွာ မှတ်တမ်းမှတ်ရာတိအားနည်းရေလို့ အနောက်နိုင်ငံက တချို့ပြောကတ်စွာတိ ဟိရေ ။ ကိုယ့်အိမ်မှာ မိသားစု အစွာနှစ်ယောက်ဟိရေလဲ ၊ အိမ်မှာ အိမ်တိုင် အစွာနှစ်ချောင်းပါရေလဲ ၊ အိမ်ကို အစွာနှစ်မှာဆောက်ခရေလဲလို့ မိန့်ကြည့်ကေ ချက်ချင်းမဖြီနိုင်ကတ်စွာတိကို ကြည့်ကေ ဇာလောက် မှတ်တမ်းအားနည်းပြီးကေ အမှတ်မထားလဲဆိုစွာ ပေါ်လွင်ရေ ။ တချို့ကတော့ မှတ်စုစာအုပ်ထဲမှာ မှတ်လို့ဟိစွာလို့ ဆင်ခြီပီးကတ်စွာတိဟိရေ  ။ အမှန်က ဂနိရခိုင်ဆိုစွာ ခြင်္သေ့လိုက်ကေ ထွက်ပြီးကတ်တေ မြင်းကျားချေတိပိုင် အမှတ်နည်းလွန်းအားကြီးရေ ။ အန္တရာယ်နန့်ကြုံကေ ထွက်ပြီးကတ်ပနာ ကိုယ့်ဘေးနာက တကောင်ကောင်က ခြင်္သေ့ဘာ့မှာအဆွဲခံလိုက်ရကေ မသိမသာချေန စောင်းကြည့် ၊ အပြီးရပ်ပနာ ဆက်လို့ မြက်စားကတ်တေသဘာဝပချောင် ။ မသိမသာနန့် မဆိုင်ရေပိုင်နိန်ထိုင်ကတ်တေ အလိုနည်းလွန်းခြင်း စရိုက်တိစွာ ဇာခေတ်ကာလကပင် ရခိုင့်အနွယ်မှာ သန္ဓေတည်လာစွာလည်း မဆိုနိုင်ပျာ ။

များပြားလာရေ အုပ်စုဖွဲ့ အသင်းအပင်းတိဆိုစွာလေ့ ပရဟိတလို့ တမျိုး ၊ ဖောင်ဒေးရှင်းလို့ရာတဖုံ ၊ ပါတီအတွက်လို့ရာ တချို့ ၊ စည်းထိမ်းလို့ရာ တစု ဒေပိုင် ဂရုဂရုတိ ကန်ကမကန် ရခိုင်ပြည်မှာ အများကြီး ဟိလာစွာကို ဂနိမျက်မှောက်မှာ တွိရရေ ။ စုစည်းမှုက အားဖြစ်တေလို့ အဆိုဟိကေ တစိုက်မတ်မတ်လုပ်တတ်တေ ဖြစ်စဉ်က ယင်းအားအသက်ရှင်ဖို့အတွက် လီရှုပေါက်တိဖြစ်တေ ။

လိုအပ်ချက်တိအများကြီးထဲက ရခိုင်ပြည်မှာ ငါရို့အစွာလိုအပ်ချက်ကို ဖြည့်ဆည်းသင့်ရေလဲ ၊ အစွာကဏ္ဍက ပါဝင်သင့်ရေလဲဆိုပျာ ကြည့်တတ် မြင်တတ်ကတ်ပြီးမှ အထက်ကပြောခရေ အသင်းအဖွဲ့မျိုးတိဖြစ်လာစွာလို့ ငါရို့ ယုံကြည်ရေ ။ ယင်းအထဲမှာ

ရခိုင့်ပထဝီအနိန်အထားကိုလေ့လာရေအုပ်စုတိ နည်းရေ .

ရခိုင့်စိုက်ပျိုးရေးကိုလေ့လာရေအုပ်စုတိတိ နည်းရေ ။

ရခိုင့်ခရီးလားလုပ်ငန်းကိုလေ့လာရေအုပ်စုတိ နည်းရေ။

ရခိုင့်သဘာဝ(မိုးလီဝသ) ကိုလေ့လာရေအုပ်စုတိနည်းရေ ။

ရခိုင့်ဘူမိဘေဒသမားတိ ၊ ရခိုင့်ဇီဝဘေဒသမားတိ  ၊ ရခိုင့်ဓာတုဗေဒသမားတိ ၊ ရခိုင့်ဘိုတနီသမားတိ ၊ ရခိုင့်ဇူးလိုဂျီသမားတိ နည်းရေ ။

ကိုယ့်မြို့ဧ့ ပထဝီအနိန်အထားကို မသိ ၊ စိုက်ပျိုးမွေးမြူရေးလုပ်ငန်းတိ အစွာလောက်ဟိလို့ အစွာလောက်မဟိဆိုစွာကို မသိ ၊ ခရီးလားလုပ်ငန်းအကြောင်းနန့် အစွာလောက် အကျိုးသက်ရောက်မှုဟိစွာနန့်ရီလမ်း ၊ ကုန်လမ်း အစွာလောက်အကျိုးပြုနိုင်စွမ်းဟိရေ အခြီအနိန်နန့် လမ်းပန်း ဆက်သွယ်ရေးအခြီအနိန်ကို မသိ ၊ မိုးလီဝသအကြောင်းကို သတင်းစာန ရုပ်သံကလွဲလို့ ဇာအခြီအနိန်မှာ ရာသီဥတုက ဆိုတတ်တေ ၊ ဇာအခြီအနိန်ကြောင့် ဖျားရီမြုပ်တတ်တေဆိုစွာကို သုတေသနလုပ်ဖို့ ခြီလှမ်းစဖူးရေ လူတောင် မဟိ ။ ယင်းအထဲမှာ အဆိုးရွားဆုံးက သုတေသနဆိုစွာ ဇာလဲဆိုစွာကိုတောင်မှ မသိလိုက်ကတ်ဗျာလ် ။ ယေခါ တစိုက်မတ်မတ်လုပ်တတ်တေ ဗီဇတခုစွာ ….. ပဋိပက္ခနန့် ဆင်းရဲမွဲတေမှုကြားထဲမှာ ဂြေသီသီလားရရေ ။

ယင်းကြောင့် ရခိုင့်မျိုးဆက်တိကို ဆိုချင်ပါရေ။ ]

သုတေသန လုပ်ကတ်ပါ ။ ဗမာအစိုးရဘားက ဇာတခုလေ့ မမျှောမှန်ဘဲနန့် သုတေသလုပ်ငန်းတိကို အားကြိုးမာန်တက် လုပ်ကတ်ပါ ။ အကျိုးဟိကေ အကြောင်းကိုသိယောင်ရှာတတ်မှ ပစ္စက္ခဆိုစွာ တောက်ပနိုင်ဖို့ဖြစ်တေ။

ပရဟိတနန့်ဂျဲ အချိန်ကုန်မနိန်ကတ်ကေ့ ။

ပဋိပက္ခထဲမှာဂျဲ ဝိုင်းကြီပတ်ပတ်ဒူဝေဝေ မလုပ်နိန်ကတ်ကေ့ ။

ပါတီအကွဲအပြဲထဲမှာဂျဲ မကြီးမနပ်ဖြစ်မနိန်ကတ်ကေ့ဖိ ။

ရခိုင်ပြည်အတွက် ရခိုင်သားမလုပ်ကေ ဇာသားကလဲ လာလို့မလုပ်ဆိုစွာကို မြင်ကတ်ပါ ။

သုတေသနမဟိကေ ဇာနိုင်ငံ ဇာလူမျိုးလေ့ မတိုးတက်မဖွံ့ဖြိုးနိုင်ဆိုရေအသိန ကိုယ့်အဖရခိုင်ပြည်သားတိကို မတ်ဆေးပီးချင်ပါရေ ။

ကိုယ့်အဖပြည် ကိုယ့်မျိုးနွယ်တွက်

ကိုယ်ရာမလုပ် မျှော်ခြင်းလုပ်ကေ

ကိုယ့်တိုင်းကိုယ့်ပြည် မှောက်လိမ့်မေ ။

ကိုယ့်အဖပြည် ကိုယ့်မျိုးနွယ်တွက်

ကိုယ်စွမ်းကိုယ်ဆောင် ကိုယ့်မှုအောင်မှ

ကိုယ့်တိုင်ကိုယ့်ပြည် လှလိမ့်မေ ။

သာစွလေ ။

Admin (09:30pm,16.08.2017)